اللہ تعالیٰ کے خوف کی علامت

ALLAH K KHAOF KI ALAMAT

ہوسکتا ہے کہ آپ کے ذہن میں یہ سوال پیدا ہو کہ خوفِ خدا عزوجل تو ایک قلبی کیفیت کانام ہے ، ہمیں کس طرح معلوم ہو کہ ہمارے دل میں رب تعالیٰ کا خوف موجود ہے اور اگر ہے تو بیان کردہ درجات میں سے کس نوعیت کا ہے ؟
تو یاد رکھئے کہ عموماًہر کیفتِ قلبی کی کچھ علامات ہوتی ہے جن کی بناء پر پتہ چلایا جاسکتا ہے کہ وہ کیفیت دل میں پائی جارہی ہے یا نہیں ؟ اسی طرح خوفِ الٰہی عزوجل کی بھی چند علامات ہیں ،جن کے سبب ہمیں اپنی قلبی کیفیت کا اندازہ کرنے میں دقت پیش نہیں آئے گی ،
چنانچہ حضرت سَیِّدُنا فقیہہ ابواللیث سمر قندی رضي اللہ تعالي عنہ ارشاد فرماتے ہیں کہ ، اللہ تعالیٰ کے خوف کی علامت آٹھ چیزوں میں ظاہر ہوتی ہے ،
------------------
(1) انسان کی زبان میں ،وہ اس طرح کہ رب تعالیٰ کا خوف اس کی زبان کو جھوٹ،غیبت، فضول گوئی سے روکے گا اور اُسے ذکر ُ اللہ عزوجل ،تلاوتِ قرآن اور علمی گفتگو میں مشغول رکھے گا ۔
------------------
(2) اس کے شکم میں ،وہ اس طرح کہ وہ اپنے پیٹ میں حرام کو داخل نہ کریگا اور حلال چیز بھی بقدر ِضرورت کھائے گا ۔
------------------
(3) اس کی آنکھ میں ، وہ اس طرح کہ وہ اسے حرام دیکھنے سے بچائے گا اور دنیا کی طرف رغبت سے نہیں بلکہ حصول ِعبرت کے لئے دیکھے گا ۔
------------------
(4) اس کے ہاتھ میں ،وہ اس طرح کہ وہ کبھی بھی اپنے ہاتھ کو حرام کی جانب نہیں بڑھائے گا بلکہ ہمیشہ اطاعتِ الٰہی عزوجل میں استعمال کریگا ۔
------------------
(5) اس کے قدموں میں ،وہ اس طرح کہ وہ انہیں اللہ تعالیٰ کی نافرمانی میں نہیں اٹھائے گا بلکہ اس کے حکم کی اطاعت کے لئے اٹھائے گا ۔
------------------
(6) اس کے دل میں ، وہ اس طرح کہ وہ اپنے دل سے بغض، کینہ اور مسلمان بھائیوں سے حسد کرنے کو دور کر دے اور اس میں خیرخواہی اور مسلمانوں سے نرمی کا سلوک کرنے کا جذبہ بیدار کرے۔
------------------
(7) اس کی اطاعت وفرمانبرداری میں ، اس طرح کہ وہ فقط اللہ تعالیٰ کی رضا کے لئے عبادت کرے اور ریاء ونفاق سے خائف رہے ۔
------------------
(8) اس کی سماعت میں، اس طرح کہ وہ جائز بات کے علاوہ کچھ نہ سنے ۔
=================
( درۃ الناصحین ،المجلس الثلاثون ،ص۱۲۷)

اس تفصیل سے بخوبی معلوم ہوگیا کہ قبر وحشر اور حساب ومیزان وغیرہ کے حالات سن کر یا پڑھ کر محض چند آہیں بھر لینا ...یا... اپنے سر کوچند مرتبہ اِدھر اُدھر پِھرا لینا ...یا... کف ِافسوس مل لینا...یا پھر...چند آنسو بہا لینا ہی کافی نہیں، بلکہ اس کے ساتھ ساتھ خوفِ خدا عزوجل کے عملی تقاضوں کو پورا کرتے ہوئے گناہوں کا ترک کردینا اور اطاعتِ الٰہی عزوجل میں مشغول ہوجانابھی اُخروی نجات کے لئے بے حد ضروری ہے ۔