امریکہ بہادر

america

مولانا جلال الدین رومی لکھتے ہیں:

ایک شیر ، بھیڑیا اور لومڑی شکار کی طلب میں پہاڑ پر پہنچے ، اور گائے ، بکری ، خرگوش کا شکار کیا ۔
شیرنے بھیڑیے سے کہا:
تو پرانا ہے ، اِنھیں انصاف سےتقسیم کر ، تاکہ تیرا تجربہ معلوم ہوسکے ۔
بھیڑیا کہنے لگا:
بادشاہ سلامت! یہ گائے آپ کے لیے ، کیوں کہ یہ بڑی ہے اور آپ بھی بڑے ہیں ، شہ زور ہیں ۔
بکری درمیانی ہے ( میں بھی درمیانہ ہوں ) اس لیے یہ میری ہوئی ، اورخرگوش لومڑی صاحبہ کا ہوا ( کیوں کہ ان کا قد ہم دونوں سے چھوٹا ہے ) ؛ میرا تو یہی درست فیصلہ ہے!

شیرنے اُس کی کھوسٹ تقسیم دیکھی تو چراغ پا ہوگیا ، کہنے لگا:

شیر گفت ای گرگ چون گفتی بگو
چون که من باشم تو گویی ما و تو

گفت پیش آ ای خری کاو خود بدید
پیشش آمد پنجه زد او را درید

او بھڑیے یہ کیا بکتا ہے ، جب میں موجود ہوں تو میرے تیرے کی کیا بات ؛ او خود پسند گدھے آگے آ ! جب بھیڑیا آگے آیا ، توشیرنے پنجے سے اسے چیرپھاڑ دیا ۔
اس کے بعد لومڑی کی طرف رخ کیا اور کہا ، تُو تقسیم کر !
لومڑی سجدے میں گرگئی اورعرض کی:
یہ موٹی تازی گائے میرے بادشاہ کا ناشتہ ہوگا ، بکری دوپہر کو یخنی کےلیے استعمال فرمائیے گا اورخرگوش شام کے کھانے میں ۔

شیر اس تقسیم پر بہت خوش ہوا اور کہا:

گفت ای روبه تو عدل افروختی
این چنین قسمت ز کی آموختی‌

از کجا آموختی این ای بزرگ
گفت ای شاه جهان از حال گرگ‌

تونے انصاف روشن کردیا ؛ اے عقل مند لومڑی! بتا یہ عمدہ تقسیم تو نے کہاں سے سیکھی ہے ؟
عرض کرنے لگی: اے شاہِ جہاں ، بھیڑیے کے انجام سے!

گفت چون در عشق ما گشتی گرو
هر سه را برگیر و بستان و برو

شیر کہنے لگا:
جب تو میرے عشق میں اس طرح گم ہے تو یہ تینوں تیرے ہوئے ، انھیں قبضے میں کر اور چلتی بن !

دیکھیے: مثنوی معنوی ، دفتر اول ، ص 115 ، 116 ، 117 ، ط تھران ، س 1387

امریکہ بہادر اس وقت شیر بنا بیٹھا ہے ، جو ملک بھیڑیے کی طرح حکومتی معاملات تقسیم کرنے کی کوشش کرتے ہیں ، انھیں انجام تک پہنچا دیتا ہے ؛ اور جو لومڑی کا کردار ادا کرتے ہے ان پر نوازشات کی بارشیں ہوتی ہیں ۔
اِس خون خوار کو پچھاڑنے کے لیے ، موجودہ سیاسی بھیڑیوں اور لومڑیوں کی نہیں ، سلطان ایوبی جیسےشیروں کی ضرورت ہے !!

لقمان شاہد
11/8/2018 ء
https://www.facebook.com/qari.luqman.92