اسلامی سال اور ہمارا حال

Islami Saal Aur Hamara Haal

اسلامی سال اور ہمارا حال
*********************
محب و مکرم قارئین کرام السلام علیکم ورحمتہ وبرکاتہ

نیا اسلامی سال مبارک ہو۔ماہ محرم الحرام کی یکم کو مراد رسول حضرت سیدنا فاروق اعظم (رضی اللہ عنہ)نے جام شہادت نوش فرمایا۔دوران نماز حملہ ہوا۔ جو شہادت کی آرزو کی تکمیل کا سبب بنا۔دسویں محرم الحرام کو نواسہ رسول حضرت سیدنا امام حسین(رضی اللہ عنہ)نے جام شہادت نوش فرمایا۔حالت سجدہ میں تھے کہ سر تن سے جدا کر دیا گیا۔
اللہ اکبر

تاریخ اسلام کی عظیم شہادتیں کیا پیغام دے رہی ہیں۔مراد رسول (صلی اللہ علیہ والہ وسلم)اور نواسہ رسول (صلی اللہ علیہ والہ وسلم)نے بانی اسلام کی غلامی کا حق ادا کرتے ہوئے اسلام کا جھنڈا سربلند فرمایا۔ اسلام کی سربلندی مقصد حیات ہے۔

ہر سال محرم الحرام کا چاند نظر آتے ہی ایک عجیب سا ماحول نظر آتاہے۔اور وہ بھی سر بازارسڑکیں بلاک ہوتی ہیں۔دکانیں بند کرواکر کے جلسے جلوس منعقد ہوتے ہیں۔ مگر مساجد میں نمازیوں کی حاضری میں کوئی اضافہ نہیں۔کردار میں کوئی تبدیلی کا خیال نہیں۔ فاروقی و حسینی چال نہیں۔ بس یہ کہہ لیا جائے کہ ہمارا کوئی حال نہیں۔ جی ہاں۔ لمحہ بھر کے لئے سوچنا ہوگا تاریخ اسلام تو قربانیوں سے بھری پڑی ہے۔ کرب و بلا کی تپتی زمین پر امام عالی مقام نے جام شہادت اور نیزے کی نوک پرقرآن کی تلاوت کرکے امت مسلمہ کو ایک عظیم پیغام دیا ہے کہ مسلام اسلام کی خاطر جان کا نظرانہ بھی دے سکتا ہے اور کرب کے حالات میں بھی نماز اور تلاوت قرآن کا عمل متروک نہیں کر تا۔

اور ہم لوگ نرم و نازک بستر پر بھی نماز، تلاوت قرآن اور اسلام کی سر بلندی کا دھیان نہیں رکھتے۔ اسلام کے لئے وقت قربان نہیں کرتے۔ مال قربان نہیں کرتے۔جان کی قربانی تو بڑا معنی رکھتی ہے۔ کیا ہم لوک صرف نویں اور دسویں محرم کو بازار بند کر کے گھروں میں بیٹھ کر حب صحابہ اور حب اہلبیت کا حق ادا کر دیتے ہیں۔ نہیں بلکہ ہمیں اصحاب رسول اور آل رسول کی محبت کی وارفتگی کے ساتھ ان کی زندگیوں کا مطالعہ کرتے ہوئے ۔ ان کی تعلیمات پر عمل کر کے اپنا حال خوبصورت کرنے کی سعی کرنی چاہئے۔ اللہ کریم ہمارا حال اسی سال اچھا کردے ۔ آمین

تحریر حافظ محمد عدیل یوسف صدیقی صاحب
اداریہ مجلہ محی الدین فیصل آباد پاکستان