پھر اٹھا ولولہء یاد مغیلان عرب

phir utha walwalae Yaad e Mughilan e arab

پھر اٹھا ولولہء یاد مغیلان عرب
پھر کھنچا دامن دل سوۓ بیابان عرب

باغ فردوس کو جاتے ہیں ہزاران عرب
ہاۓ صحراۓ عرب ہاۓ بیابان عرب

میٹھی باتیں تیری دین عجم ایمان عرب
نمکیں حسن تیرا جان عجم شان عرب

اب تو ہے گریہ خوں گوہر دامان عرب
جس میں دو لعل تھے زہرا کے وہ تھی کان عرب

دل وہی دل ہے جو آنکھوں سے ہو حیران عرب
آنکھیں وہ آنکھیں ہیں جو دل سے ہوں قربان عرب
-----------------------
ولولہ (جوش) ، مغیلان (کانٹے دار درخت) ، بیابان (جنگل)،فردوس (جنت) ، گریہ (رونا) ، ، گوہر (موتی)، دامان (آنچل) ، لعل (سرخ قیمتی پتھر) ، زہرا (حضرت فاطمہ خاتون جنت رضی اللہ عنھا) ، کان (معدن)
-----------------------

ہاۓ کس وقت لگی پھانس الم کی دل میں
کہ بہت دور ہے وہ خار مغیلان عرب

فصل گل لاکھ نہ ہو وصل کی رکھ آس ہزار
پھولتے پھلتے ہیں وہ بے فصل گلستان عرب

صدقے ہونے کو چلے آتے ہیں لاکھوں گلزار
کچھ عجب رنگ سے پھولا ہے گلستان عرب

عندلیبی پہ جھگڑتے ہیں کٹے مرتے ہیں
گل و بلبل کو لڑاتا ہے گلستان عرب

صدقے رحمت کے کہاں پھول کہاں خار کا کام
خود ہے دامن کش بلبل گل خندان عرب
-----------------------
پھانس (لکڑی کا ریشہ جو کانٹے کی طرح ہوتا ہے) ، الم (درد) ، وصل (ملاقات)، آس (امید) ، بے فصل( بے موسم) ، گلستان (باغ) ، عندلیبی (نغمہ سرائی) ، دامن کش (دامن کھینچنے والا) ، گل خنداں (کھلا ہوا پھول)
-----------------------

شادی حشر ہے صدقے میں چھٹیں گے قیدی
عر ش پر دھوم سے ہے دعوت مہمان عرب

چرچے ہوتے ہیں یہ کملاۓ ہوے پھولوں میں
کیوں یہ دن دیکھتے پاتے جو بیابان عرب

تیرے بے دام کے بندے ہیں رئیسان عجم
تیرے بےدام کے بندی ہیں ہزارن عرب

ہشت خلد آئیں وہاں کسب لطافت کو رضا
چار دن برسے جہاں ابر بہاران عرب
-----------------------
شادی حشر ( خوشی میں جمع ہونا) ، کملاۓ (مرجھاۓ‎) ، بے دام (مفت کے نوکر) ، رئیسان عجم (عجم کےبادشاہ) ، بندی (قیدی) ، ہشت خلد (آٹھوں جنت) ، کسب لطافت (حصول نزاکت) ، برسے (بارش ہو ) ،ابر بہاران (موسم بہار کا بادل)
-----------------------
از: سیدی اعلی حضرت امام عشق و محبت امام اہلسنت الشاہ امام احمد رضا خان بریلوی رحمۃ اللہ علیہ